Idman.az

Mourinyo «Reala» «yox» dedi

22 may 2009, cümə, 6:15

«Real» prezidentliyinə əsas namizəd Florentino Peres Joze Mourinyoya «kral klubunu» çalışdırmaq təklifi ilə müraciət edib və ona fikirləşmək üçün bir həftə vaxt verib. Bundan xəbər tutan «İnterin» sahibi Massimo Moratti, portuqaliyalı mütəxəssis ilə təcili görüş keçirib və onun yekunlarına görə La Gazzetta dello Sport nəşrinə bəyanat verib.

«İspaniyadan bu xəbərlər gələn kimi Mourinyo ilə klubun baş ofisində söhbətləşdik. Baş məşqçimiz məni inandırdı ki, o Milanda qalmaq niyyətindədir. Ona inanmamağa heç bir lüzum görmürəm. Hərçənd, hər şeyi özündən soruşsanız yaxşıdır».

Mourinyonun müqaviləsi 2011-ci ilədək nəzərdə tutulub, lakin bir şərtə əsasən, İspaniyadan təklif gələcəyi təqdirdə, məşqçi 6 milyon funt təzminat müqabilində vaxtından əvvəl sazişi poza bilər. Peresin «The Special One»-məşqçiyə müraciətinin səbəbi isə dünən Vengerdən imtina cavabı almağı olub. Hərçənd, gələcək prezidentin Mourinyo xülyası da, deyəsən, gerçəkləşməyəcək.

«Deyirlər, güya ki, skudettonu qazanandan sonra mən «İnteri» tərk etmək istəyirəm. Lakin bu belə deyil. Doğrudur, mən «Böyük Dəbilqəyə» sahib olmaq istəyirəm, yəni ki, hər üç güclü Avropa çempionatlarının hamısında qalib gəlmək arzusundayam. İngiltərə və İtaliyada qalib gəldim, indi qalıb İspaniya. Lakin bu məqsədə mən karyeram boyu nail olmaq niyyətindədyəm, onun sonuna isə hələ 20 il var. Ona görə də, 100% «İnterdə» qalıram, əlbəttə ki, Moratti özü məni qovmasa. Lakin deyə bilərəm ki, «Realın» gələcək məşqçisi xoşbəxt insandır.

Hesab edirəm ki, bizim komanda «Barselona», «Çelsi» və «Mançester Yunayteddən» səviyyəcə geri qalır. Əminəm ki, Çempionlar liqasının yarımfinalına çıxsaq da, orada heç bir şansımız olmayacaqdı. Mən hələ mövsümün əvvəlində demişdim ki, Çempionlar liqasını qazanmağa bizim gücümüz çatmaz. «İnterə» və həmçinin «Milana», «Yuventusa», «Bayernə», «Portuya» və başqalarına güclü komandalarla mübarizə aparmaq üçün kifayət qədər güclənmək lazımdır.

İtaliya çempionatında qalib gəlmək İngiltərədən daha çətindir, çünki İtaliyada A seriyasının bütün komandaları çox yaxşı hazırlıqlıdırlar. İngiltərədə asan matçlar olursa, İtaliyada hər bir rəqiblə çətinliklə üzləşirsən», – Portuqaliya və İtaliya mətbuatı Mourinyodan sitat gətirir.

«Yuventusun» yeni baş məşqçisinin təyin olunmasında İtaliya yığmasının baş məşqçisi Marçello Lippinin əli olacağı gözlənilir. Tuttosport xəbər verir ki, klub rəhbərləri ilə sız əlaqələri olan Lippi, artıq boş qalmış postu tutacaq mütəxəssisə dair öz tövsiyyələrini verib. «Yuventusun» bu məşçinin adını isə mövsümün sonunda açıqlayacağı gözlənilir.