Idman.az

Komandalar kvalifikasiyadan sonra mühərriki cəriməsiz dəyişə biləcəklər

31 yanvar 2009, şənbə, 18:26

FİA mühərriklərə dair reqlamentin yeni müddəalarına aydınlıq gətirib.

Xatırladaq ki, 2009-cu il mövsümünün qanunlarına görə, hər pilot 8 mühərriki istədiyi ardıcıllıqla işlədə bilər və cəzanı (start şəbəkəsində 10 yer) ancaq ona əlavə 9-cu mühərrikin lazım olduğu halda alacaq.

Bəzi komandalar bu müddəa barədə aydınlıq gətirilməsini tələb etdilər, xüsusilə cərimənin doqquzuncu mühərrikin işləndiyi hər yürüşdə, yoxsa təkcə ilk yürüşdə tətbiq olunacağı barədə.

Autosport xəbər verir ki, penalti ilk yürüşdə tətbiq olunacaq. Beləliklə, əgər Braziliya və Əbu-Dabi Qran-Prilərində hər hansı bir yürüşçü əlavə doqquzuncu mühərriki işlədəcəksə, o «İnterlaqosun» start şəbəkəsində 10 mövqe arxaya yerləşdiriləcək. Bunu FİA-nın texniki nümayəndəsi Çarli Uaytiq təsdiq edib.

«Yürüşçü cəriməni bir dəfə, doqquzuncu mühərrikin işləndiyi ilk mərhələdə alacaq», – Autosport Uaytiqdən sitat gətirir.

Bundan başqa, Uaytiq təsdiq etdi ki, komandalar güc aqreqatını şənbə kvalifikasiyasından sonra, «bağlı park» adlanan yerdə dəyişə bilərlər və özü də ancaq maşında quraşdırılan mühərrikdə problem olduğunu sübüt edə biləcəklərsə.

«Nə mühərrik, nə də onun hissələri bağlı parkda olarkən dəyişdirilə biləsi elementlər siyahısında yoxdurlar. Ancaq idman reqlamentinin 34.1 maddəsinə əsasən texniki nümayəndənin icazəsi ilə əlavə işlər görülməsi mümkündür.

Beləliklə, əgər komanda mühərrikdə problem olduğunu bizə inandıra bilsə, o, yəqin ki, onu cəriməsiz dəyişdirə biləcək. Ancaq onlar nasazlığı aradan qaldırmaq üçün plombaları sındırsalar, bu mühərriki bir də işlədə bilməzlər», – Autosport Uaytiqin sözlərini gətirir.

Xatırladaq ki, FİA-nın icazəsi olmadan bolidin bağlı parkda hər hansı bir hissəsi dəyişdirilərsə, pilot yarışda pit-leyndən start götürəcək.