Idman.az

Florentino Peres öz möhtəşəm layihəsi ilə «Realın» prezidenti seçildi

2 iyun 2009, çərşənbə axşamı, 6:23

Florentino Peres Madrid «Realının» rəsmən prezidenti seçildi. Onun bütün rəqibləri seçkiqabağı kampaniya dövründə öz namizədliklərini geri götürüblər.

62 yaşlı Peres 2000-2006-cı illərdə artıq kluba rəhbərlik etmişdi. Onun başçılığı dövründə klub iki dəfə İspaniya çempionatı və bir dəfə Çempionlar liqasında qalib gəlib, Zinedin Zidan, Luiş Fiqu, Devid Bekhem, Ronaldo kimi ulduzlar «kral klubunun» formasını geyib.

Peres keçirdiyi ilk yığıncaq zamanı təyin etdiyi köməkçilərin adlarını açıqlayıb. Belə ki, «Realın» keçmiş futbolçusu Zinedin Zidanı Peres özünə məsləhətçi seçib, digər keçmiş futbolçu Xorxe Valdano isə baş direktor təyin edilib.

Xatırladaq ki, argentinalı Valdano «kral klubunun» şərəfini 80-ci illərdə qoruyub, Zidan isə «Yuventusdan» 2000-ci ildə «Reala» keçib.

Yeni prezident «Realın» rəsmi saytında «qalaktikosu» 21-ci əsrin ən güclü komandası etmək niyyətində olduğunu bildirib.

«Real» bütün şübhələri geridə qoyaraq, ona həmişə xas olan böyük məqsəd uğrunda irəliləməlidir – elə işləməliyik ki, 21-ci əsrin ən güclü komandasına çevrilək.

Növbəti dörd il ərzində dünyanın ən mötəbər klubuna rəhbərlik etmək çox şərəfli və eyni zamanda böyük məsuliyyət tələb edən addımdır. Biz bilirik ki, necə çətin zamanda gəlirik və bizdən nə gözləyirlər. Bütün gücümüzü səfərbər edərək işləyəcəyik.

«Real» futbol tarixində xüsusi yerə sahibdir, ona görə də həmişə nümunəvi olmalıdır. Biz anlamalıyıq ki, bu nüfuz ən böyük sərvətimizdir və ona klubun 107 illik tarixi boyu nail olmuşuq», – deyə Peres bəyan edib.

Artıq Manuel Pelleqrinini kluba baş məşqçi qismində gətirən Peresin mümkün oyunçu transferlərinə dair sanballı siyahısı da var.

Məşhur futbol agenti Ernesto Bronzetti bəyan edib ki, yeni prezident futbolçu alışlarına pulu əsirgəməyəcək.

«Peresin istədiyi futbolçuları almağa 250 milyon avrosu var. Onlar arasında Zlatan İbrahimoviç, Kaka, Frank Riberi və, əlbəttə ki, Kriştianu Ronaldu var. Ola bilər ki, onların hamısını almaq mümkün olmasın, lakin bu siyahıdan bir neçəsi «Realın» futbolçusu olacaq, Ronaldu ilə isə artıq müqavilə imzalanıb», – Goal portalı Bronzettidən sitat gətirir.