Idman.az

Buffonlu-Del Pyerosuz «Yuventus»

15 may 2009, cümə, 6:24

«Mançester Yunayted» Braziliyanın «Korintians» klubunun 17 yaşlı müdafiəçisi Dodo ilə güclənmək niyyətindədir. Futbolçunun hələlik 18 yaşı bitmədiyindən, indi o «Yunaytedə» keçə bilməyəcək, ancaq 2010-cu ilin fevralından başlayaraq o, klubun tamhüquqlu futbolçusu olacaq.

Tuttosport xəbər verir ki, «Yuventus» Del Pyero ilə müqaviləni uzatmaq fikrində deyil. Qeyd edək ki, hal-hazırki saziş gələn mövsümün sonunadək nəzərdə tutulub. «Byankonerilər» heyətin gəncləşdirilməsi və xərclərin azaldılması kimi islahatlara başlamaq niyyətindədirlər və 34 yaşlı veteran futbolçu bu şərtlərin heç birinə cavab vermir. Həm də, Dieqonun alışından sonra, eyni mövqedə çıxış edən Del Pyero ilə braziliyalı futbolçunun eyni zamanda funksiyaları necə paylaşdıracaqları barədə mütəxəssislərin qaldırdıqları problem, hadisələrin belə gedişatı təqdirində təbii yolla yoxa çıxacaq. Onu da nəzərə alaq ki, Dieqo Del Pyerodan 10 yaşı kiçikdir. Futbolçunun özü yaranmış vəziyyəti şərh etməkdən boyun qaçırıb.

Bundesliqanın ən dəqiq snayperlərindən olan «Volfsburqun» bosniyalı hücumçusu Edin Zeko agentinin «Çelsi» ilə danışıqlara başladığını bəyan edib.

«Çelsi» tərəfdən maraq mənim üçün çox xoşdur. Artıq agentimlə «zadəganlar» arasında konkret danışıqlar keçirilib, ancaq nəticə barədə bir şey deyə bilmərəm. Mənim İspaniyadan və İngiltərənin digər klublarından da təkliflərim var və onları mövsüm başa çatandan sonra nəzərdən keçirəcəyik. Çempionluq yarışında diqqətimi toparlamalıyam», – deyə Zeko qeyd edib. Xatırladaq ki, mövsüm başa çatandan sonra baş məşqçisini də itirəcək «Volfsburq», «Bayernlə» eyni xal toplasa da, topların daha yaxşı fərqinə görə ilk pilləni tutur. Almaniyada isə yekunda məhz top fərqinin həlledici rol oynayacağını təxmin edirlər.

«Yuventusun» qapıçısı Canluici Buffon gələn mövsüm üçün planları haqda qərara gəldiyini bəyan edib. Qolkiper rəhbərlik ilə apardığı danışıqların müsbət həll olunduğunu qeyd edib.

«Rəsmən bəyan edirəm ki, gələn mövsümü də «Yuventusda» keçirəcəyəm. Klub rəhbərliyi ilə ciddi söhbətim olub və onlar məni inandırdılar ki, komandanı işıqlı gələcək gözləyir.

Mən bilmək istəyirdim ki, yaxın üç-dörd il ərzində klubun perspektivləri necə olacaq. Bircə mən yox, «Yuventusda» hamı istəyir ki, komandamız istənilən rəqiblə mübarizə aparmağa qadir olsun. Və məni inandırdılar ki, bu belə də olacaq.

İndi biz mövsümü bacardıqca yaxşı əhval-ruhiyyədə yola verməliyik. «Milanla» matç göstərdi ki, biz əvvəlki matçlara nisbətən daha yaxşı futbol göstərə bilərik», – Buffonun klubun rəsmi saytında yerləşdirilən bəyanatında deyilir.