Idman.az

Benites Ferqyusona təzyiq göstərməkdə davam edəcək

25 aprel 2009, şənbə, 6:06

«Liverpulun» baş məşqçisi Rafael Benites «Mançester Yunaytedin» rəhbəri Aleks Ferqyusonla söz güləşdirməyə davam edir. İki mütəxəssisin bu ilin əvvəlindən gərginləşən əlaqələri keçən həftə ən böyük nöqtəsinə çatmışdır. Benites isə geri çəkilmək niyyətində olmadığını bir daha nümayiş etdirdi.

«Aleks Ferqyusonla söz güləşdirməyə davam etmək istəməsəm də, fikrim qətidir: o görür ki, bizim komandamız daha güclüdür və biz «Yunaytedə» yaxınıq. O həmişədən beyinə işləməyək oyunlarından istifadə edir. İndiyə qədər heç kim ona söz qaytarmayıb, qarşısına çıxa bilməmişdir. Elə təəssürat yaranır ki, belə fəaliyyət göstərmək üçün onun lisenziyası var və daha heç kəs belə hərəkət edə bilməz. Mən az danışıram. Dediyimin hamısı komandamın müdafiəsinə yönəlib. O indi əsəbi görünür, çünki onun komandasına çox yaxınıq».

Çərşənbə axşamı «Liverpul» «Arsenalla» mübarizədə xallar itirdi (4:4). İndi Benitesin komandası üçün son 19 ildə ilk çempionluğunu qazanmaq çox çətin olacaq, çünki «Mançester Yunayted» üç xal irəlidədir və aktivində hələ artıq bir matç da var.

«Bizə «Yunaytedə» təzyiq etməyə davam etmək qalır. Təslim olmaq lazım deyil. Heç cürə onlara imkan vermək olmaz ki, təzyiqin enməsini hiss etsinlər. Onların üstünlüyü var. Onlar büdrəməsə, bizim əlimiz heç nəyə çatmaz. Ancaq səhv buraxacaqları halda, ötüb keçmək üçün onlara tamamilə yaxın olmaq lazımdır. Hər halda, titulu qazanmaq üçün səylə çalışacağıq. Bu mümkün olana qədər», – deyə Benites İspaniyanın ABC qəzetinə bəyan edib.