Idman.az

Avropanın məşqçi yerdəyişmələri

6 may 2009, çərşənbə, 6:12

«Marsel», komandanı tərk edən Erik Geretsin əvəzinə Didye Deşamın gələcəyini rəsmən bəyan etdi. Artıq ikiillik müqavilə bağlanacağı barədə tərəflər razılığa gəliblər. Xatıradaq ki, Deşamın hələlik ən böyük məşqçi uğurları siyahısında 2003/04 mövsümündə «Monakonu» Çempionlar liqasının finalına (moneqasklar Mourinyonun «Portusuna» 0:3 hesabı ilə uduzublar) və 2006/07 mövsümündə Turin «Yuventusunu» A seriyasına çıxarmasıdır. Deşam yeni klubunun heyətində oyunçu qismində də çıxış edib. Belə ki, «Bordoda» keçirdiyi bir mövsümü çıxmaq şərti ilə Deşam «Marselin» 1989-1994 illər ərzində şərəfini qoruyaraq, klubla üç dəfə Fransa çempionluğu sevincini yaşayıb.

Daha bir Fransa klubu PSJ rəhbərliyi, bu il iyunun sonunda baş məşqçi Pol Le Quenlə müddəti başa çatan müqaviləni uzatmayacağını rəsmən bəyan edib.

«Klub üç illik birgə fəaliyyətdən sonra Pol Le Quenlə əməkdaşlığı davam etdirməyəcəyinə qərar verib. Növbəti baş məşqçinin adı yaxın həftələrdə açıqlanacaq. Mövsümün sonuna qədər isə Pol Le Quen baş məşqçi vəzifəsini icra edəcək.

«Pari Sen-Jermen» rəhbərliyi birgə əməkdaşlığa görə Pol Le Quenə təşəkkür edir. Onun zəhmətinin bəhrəsidir ki, onu əvəz edəcək mütəxəssis etibarlı klub əldə edəcək. Pol Le Quen komandaya çətin vaxtlarında kömək etdi və onun Fransanın ən güclü klubları siyahısına qayıtmağana yardımçı oldu», – deyə bəyanatda qeyd edilir.

Maraqlıdır ki, klub rəhbərliyi sonuna dörd tur qalmış Fransa çempionatının başa çatmasını gözləməyərək belə bəyanat verdi. PSJ liderlər «Marsel» və «Bordodan» 8 xal geri qalaraq, növbəti mövsüm Çempionlar liqasında çıxış etməyə imkan verən üçüncü pillədə qərarlaşan «Liondan» cəmi bir xal geri qalır.

«Yuventusa» yaxın Tuttosport nəşrinin məlumatına görə isə, klub hazırki baş məşqçi Klaudio Ranyerini mövsüm başa çatmasını gözləməyərək istefaya göndərəcək və onun yerinə «Qoca sinyoranın» əfsanəvi müdafiəçisi Çiro Ferraranı təyin edəcək. Deyilənə görə, «Leççe» ilə heç-heçə azarkeşlər və rəhbərliyin səbr kasasını daşdırıb. Bu baş verəcəyi təqdirdə, Ranyeri son 40 il içində mövsüm ərzində klubun istefaya göndərdiyi ilk məşqçi olacaq. Onun məsləhətçisi rolunda İtaliya yığmasının baş məşqçisi Marçello Lippinin çıxış edəcəyi istisna edilmir. Xatırladaq ki, bu yaxınlarda Lippi «Yuveyə» baş məşqçi qismində heç vaxt gəlməyəcəyini bəyan etmişdi.

Bu mövsüm uğurlu çıxışı ilə diqqətləri cəlb etmiş «Kalyarinin» baş məşqçisi Massimiliano Alleqri isə «Romanın» başına keçə bilər. Onlysoccer xəbər verir ki, klubun uğursuz çıxışına görə futbolçuları bir neçə gün bazada qapalı şəraitdə bağlayan xanım Sensi, Spallettinin işindən narazıdır.