Idman.az

Avropada vinger trilleri

30 may 2009, şənbə, 7:25

Madrid «Realı» prezidentliyinə digər namizədlərin öz ərizələrini götürəndən sonra bu posta iddia edən yeganə isim rolunda çıxış edən Florentino Peres, öz gələcək fəaliyyətinin çərçivələrini cızdı.

«Əminəm ki, mən kluba gələndən sonra bir çox ulduz futbolçular Madrid klubuna keçmək istəyəcək. Qanuni olaraq prezident olmayanadək transferlər barədə son danışıqlar aparmayacağam. Lakin, deyə bilərəm ki, «Milan» rəhbərliyi ilə yaxından tanış olmağım Kakanın keçidini yüngülləşdirə bilər. Mən Qalliani ilə braziliyalı futbolçu barədə çox söhbət etmişəm.

Kriştianu Ronalduya gəlincə bu futbolçu da bizim maraq dairəmiz çərçivəsindədir. Xəbərim var ki, müqavilədə yazılıb ki, ona görə 80 milyon avro ödəniləcəyi halda, klub Ronaldunu buraxacaq. Gələn həftə bu barədə lazım olan maliyyə hesablamaları aparacağıq. Həm də, nəzərə alaq ki, yeni gələnlərin yerinə bir neçə futbolçunu da satmaq lazımdır. Bununla belə, heç kim şübhə etməsin ki, köməkçilərimlə birgə möhtəşəm layihə həyata keçirəcəyik.

Baş məşqçi postuna gəlincə, əlimizdə bir neçə nəfərin adı olan siyahı var, lakin yekun qərar hələlik verilməyib. Deyə bilərəm ki, o dünyanın ən yaxşı məşqçilərindən olacaq», – Sporting Life Peresdən sitat gətirir.

The Times xəbər verir ki, «Çelsi» Karlo Ançelottinin ən əsas transfer məqsədi kimi qələmə verdiyi Frank Riberini əldən buraxmaqdan ehtiyat edir, çünki fransız futbolçu 40 milyon funtdan artıq məbləğə Madrid «Realına» keçə bilər.

Gələn həftə «Çelsiyə» baş məşqçi təyin olunmağı gözlənilən Ançelotti, ötən həftə işıq üzü görmüş avtobioqrafiyasında qeyd edib ki, bir il əvvəl Roman Abramoviçlə «Stemford Bricdə» iş barədə söhbətləşəndə, «Bayernin» yarımüdafiəçisini komanda üçün ideal oyunçu olduğunu vurğulayıb. Ançelotti hesab edir ki, Riberi «Çelsiyə» komandanın can atdığı özünəməxsusluğu gətirə bilər, lakin «Real» futbolçu üçün daha böyük məbləğ təklif edir.

Əvvəlcə «Bayern» Riberiyə görə 50 milyon funt tələb edirdi, bu isə «Realın» 2001-ci ildə «Yuventusa» Zinedin Zidan üçün ödədiyi 45,6 milyon funtu ötərək dünya rekordu ola bilər, lakin ispan klubu bu məbləği bir az saldırmağa ümidlidir.

Ançelottiyə yeni komanda hazırlamaqda transferlər vasitəsi ilə kömək etməyi düşünən «Çelsi», bununla belə, Riberiyə görə 40 milyon ödəməkdən imtina etdi, bir halda ki, iki il əvvəl onu iki dəfə ucuz ala bilərdi. O vaxt «Marseldən» «Bayernə» keçən futbolçunu London klubuna da təklif etmişdilər, lakin «zadəganlar» onun yerinə Fransa komandasının digər futbolçusu Floran Maludanı almağa üstünlük verdilər, bunun isə tamamilə yanlış addım olduğu sonradan məlum oldu.

Bir halda ki, Riberi artıq Madridə yollanır, «Çelsi» ötən mövsüm birtərəfli təsir bağışlayan komanda oyununa əlavə sürət və genişlik gətirməyə kömək edəcək digər futbolçuları nəzərdən keçirir. Bu siyahıda ilk pillələrdən birini «Aston Villanın» vingeri Eşli Yanq tutur, lakin ona bəslənən ümidləri hələlik tam doğrultmayan 23 yaşlı futbolçu üçün «Çelsi» 20 milyon funtdan artıq ödəmək fikrində deyil, bir halda ki, birmingemlilərin daha artıq məbləğ oxumaları təxmin edilir. «Villa» futbolçunu saxlamaq üçün «Çelsiyə» sərf etməyən saziş təklif edəcək, – hamının yadındadır ki, ötən yay Qaret Berrini saxlamaq üçün klub «Liverpulun» 18 milyon funtluq təklifini rədd etmişdi.

Və bu vəziyyətdə ən ağılkəsən variant kimi «Çelsinin» Qus Hiddinkin təvsiyyə etdiyi Rusiya yığmasının yarımmüdafiəçisi Yuri Jirkovun alması görünür. Moskva OMİK-inin futbolçusunun müdafiə xəttində də gözəl çıxış etməsinə görə Riberiyə əsil alternativ kimi görünməsə də, Maluda ilə birgə güclü tandem yarada biləcəkləri ehtimal edilir.

Ançelotti həm də «Liverpulu» tərk etməsi güman edilən Xabi Alonsoda da maraqlı olduğunu diqqətə çatdırıb. Lakin, ispaniyalı futbolçunun satışının müqabilində Berrini almaq istəyən «Liverpula» «Realın» daha sanballı təklif ilə müraciət edəcəyi gözlənilir, həm də ki, Alonsonun özü də İspaniyaya qayıtmaq istəyir.

Maraqlıdır ki, Jirkov üstündə əsil mübarizənin başlandığı qeyd olunur. Rusiya saytları xəbər verirlər ki, Riberinin əvəzini rusiyalı futbolçuda görən «Bayern» rəhbərliyi artıq OMİK-ə rəsmi təkliflə müraciət edib. İngiltərə mətbuatı isə «Çelsinin» almanları qabaqlayaraq artıq vingeri aldığını iddia edir. Hələlik təsdiq edilməyən informasiyaya görə, Roman Abramoviçin klubu Jirkova görə 30 milyon dollar ödəyib. Hər halda, «Çelsinin» marağı olacağı təqdirdə «Bayernin» bu keçiddə uğuru sıfıra bərabərdir, çünki OMİK-in maliyyələşməsində Abramoviçə yaxın qurumların əli olduğu hamıya məlumdur.

«Qalatasarayın» Ruud van Nistelroy xülyaları isə son anda puç olub. Danışıqların son mərhələsində zədədən bərpa olan hollandiyalı futbolçu Madriddə qalmaq istədiyini bildirib. Sabah xəbər verir ki, istanbullular bundan sonra nəzərlərini «Sevilyanın» malili futbolçusu Frederik Kanuteyə yönəldiblər və artıq sevilyalılarla danışıqlara başlayıblar. Təsdiq olunmayan informasiyaya görə, hücumçudan ötəri «Qalatasaray» hətta liderlərindən olan Mehmet Topaldan da keçməyə hazırdır, halbuki, bu futbolçunun saxlanılmasını baş məşqçi vəzifəsinə namizəd Bernd Şuster əsas tələblərdən biri kimi nəzərə çatdırıb.

Telegörüntüdən insanların dediyini ayırd etməkdə ustalan İtaliya mətbuatı Çempionlar liqasının finalında təltifolunma mərasimi zamanı İtaliyanın baş naziri və «Milanın» sahibi Silvio Berluskoninin «Barselonaya» 0:2 hesabı ilə məğlub olan «Mançester Yunaytedin» yarımmüdafiəçisi Kriştianu Ronaldunun qulağına bir neçə söz pıçıldadığını görüb.

«Səni «Milanda» görməyimə çox şad olardım», – deyə Berluskoni öz istəyi barədə futbolçunu agah edib. Onun bu eyhamını isə Ronaldu təbəssümlə qarşılayıb.

Kakadan artıq əli üzülən Berluskoni onun yerinə yeni ulduzu almaq istəyi başa düşüləndir.

Madrid «Atletikosu» isə Avropanın ən perspektivli qapıçılarından sayılan «Valyadolidin» qolkiperi Serxio Asenyonu öz sıralarına qatıb. Futbolçu üçün mübarizədə «matrasçıların» «Barselona», «Mançester Yunayted», «Liverpul» kimi komandaları qabaqlaması qeyd olunur. Görünür, 19 yaşlı qapıçını adıçəkilən klublarda heyətə düşə bilməmək təhlükəsi çəkindirib, Kupeni itirən «Atletiko» isə bu yöndə ideal klub kimi görünür.