Idman.az

Aleks Ferqyusonun gəlini və nəvələri qəzaya düşdülər

7 may 2009, cümə axşamı, 6:33

«Mançester Yunaytedin» baş məşqçisi ser Aleks Ferqyusonun 30 yaşlı gəlini Nadin iki uşağı – 10 yaşlı oğlu Çarli və 6 yaşlı qızı Qreys ilə birgə avtomobil qəzasına düşüblər. Nadin hadisə yerindən helikopter vasitəsi ilə Mançesterin xəstəxanasına çatdırılıb. Uşaqları təcili yardım maşınları ilə Krü hospitalına, Çarlini isə oradan Liverpulda yerləşən uşaq xəstəxanasına yerləşdiriblər.

Qəza çərşənbə axşamı günü səhər baş verib. Uşaqları məktəbə aparan Nadinin idarə etdiyi «Opel Corsa» maşını üz-üzə gələn «Ford Fiesta» ilə toqquşaraq, yol kənarına çıxış və orada yumalanıb.

«Oğlan çox ağır vəziyyətdədir. Qızın zədələri yüngüldür. Analarının da vəziyyəti ağırdır», – deyə polis nümayəndəsi xəbər verib. «Fordu» idarə edən 17 yaşlı qızın zədələri ciddi olmayıb.

Nadin Ferqyuson 2006-cı ildən etibarən dörd illik evlilikdən sonra əri Darrendən ayrı yaşayır. Ötən il keçmiş arvadına hücum etdiyinə görə 1 500 funt məbləğində cərimə olunan Ferqyusonun oğlu, çalışdırdığı «Piterboro» ilə səfər matçına gedirmiş, ancaq bu xəbəri eşidən kimi xəstəxanaya yollanıb. Əvvəlcə eyni hərəkətə can atan ser Aleks, sonda klubuna «Arsenalla» matçda kömək etməyi qərara alıb, matçdan sonra isə Liverpula, nəvəsinə baş çəkməyə yollanıb.

Xatırladaq ki, bu yaxınlarda Ferqyusonun başına daha bir bədbəxt hadisə gəlmişdir. Belə ki, əmanətlərini saxladığı sərmaye şirkəti böhranla əlaqədar müflis olub.